2011թ-ի դեկտեմբերի 11-ին Կառավարության N49 արձանագրային որոշմամբ հաստատվել է Հայաստանի արտահանմանն ուղղված արդյունաբերական քաղաքականության ռազմավարությունը, որը պետք է գործեր մինչև 2020 թվականը։ Թեև արդյունաբերական քաղաքականության ռազմավարության ժամկետը լրացել է և, առհասարակ, 2021թ-ի հոկտեմբերի 21-ին կառավարության որոշմամբ բոլոր արձանագրային որոշումները անվավեր են ճանաչվել, այնուամենայնիվ կառավարությունը շարունակում է՝ ռազմավարությանը հղում անելով, պետական աջակցություն ցուցաբերել ապրանքային արտահանմանը։ Վերջին տարիներին պետական աջակցությունը ՀՀ արտահանմանն ուղղված արդյունաբերական քաղաքականության ռազմավարությամբ նախատեսված միջոցառումների իրականացմանը շարունակաբար կրճատվում է և թերակատարվում, մասնավորապես, եթե 2019թ-ին միջոցառումների իրականացմանը հատկացվել էր 851 մլն դրամ՝ 21%-ով պակաս, քան սկզբնապես նախատեսվում էր, ապա 2022 և 2023 թվականների համար նախատեսված գումարը համապատասխանաբար կազմել է 360 և 300 մլն դրամ։